ഡല്‍ഹി: ഉത്തരാഖണ്ഡില്‍ മോശം കാലാവസ്ഥയെ തുടർന്ന് വഴിതെറ്റി രണ്ട് മലയാളികളടക്കം ട്രക്കിംങ് സംഘത്തിലെ 5 പേർ മരിച്ചു.
ഉത്തരകാശി ജില്ലയിലെ സഹസ്ത്ര താലിലേക്ക് ട്രെക്കിംഗിന് പോയ 22 അംഗ സംഘമാണ് മോശം കാലാവസ്ഥയെ തുടർന്ന് വഴിതെറ്റിയത്. ഇതിില്‍ അഞ്ച് പേരാണ് മരിച്ചത്. ബെംഗളൂരു ജക്കൂരില്‍ താമസിക്കുന്ന കന്യാകുമാരി തക്കല സ്വദേശി ആശാ സുധാകർ(71), പാലക്കാട് ചെർപ്പുളശേരി സ്വദേശി വി.കെ സിന്ധു (45) എന്നിവരുടേതടക്കം 5 മൃതദേഹങ്ങളാണ് ഇതുവരെ കണ്ടെത്തിയത്.
വഴി തെറ്റിപ്പോയ നാലുപേർക്കായി തെരച്ചില്‍ തുടരുകയാണ്. 13 പേരെ ബുധനാഴ്ച വൈകുന്നേരത്തോടെ രക്ഷപ്പെടുത്തി. വ്യോമസേനയുടെ നേതൃത്വത്തിലാണ് രക്ഷാപ്രവർത്തനം നടക്കുന്നത്. കർണാടക മൗണ്ടനറിങ് അസോസിയേഷന്റെ നേതൃത്വത്തിലാണ് 22 സംഘം ട്രക്കിങിനു പോയത്. മരിച്ച സിന്ധു ഡെല്ലില്‍ സോഫ്റ്റ് വെയർ എൻജിനീയറാണ്. ആശ സുധാകർ എസ്ബിഐയില്‍ നിന്നു സീനിയർ മാനേജറായി വിരമിച്ചയാളാണ്.
ട്രക്കിംഗ് സംഘത്തിനൊപ്പം ട്രെക്കിംഗ് ഏജൻസിയായ ഹിമാലയൻ വ്യൂ ട്രാക്കിംഗില്‍ നിന്ന് മൂന്ന് ഗൈഡുകള്‍ ഉണ്ടായിരുന്നുവെന്ന് ഉത്തരകാശി ജില്ലാ മജിസ്‌ട്രേറ്റ് മെഹർബൻ സിംഗ് ബിഷ്ത് പറഞ്ഞു. മെയ് 29 ന് ആണ് സംഘം ട്രെക്കിങിന് പോയത്. ജൂണ്‍ 7 ന് മടങ്ങേണ്ടതായിരുന്നുവെന്ന് ദേശീയ മാധ്യമങ്ങള്‍ റിപ്പോർട്ട് ചെയ്തു. ഇതിനിടയ്ക്കാണ് മോശം കാലാവസ്ഥയെ തുടർന്ന് യാത്ര സംഘത്തിന് വഴി തെറ്റുന്നത്. ജൂണ്‍ മൂന്നിനാണ് സംഘം ബേസ് ക്യാമ്ബിലേക്ക് തിരികെ യാത്ര ആരംഭിക്കുന്നത്. മോശം കാലാവസ്ഥയെ തുടർന്ന് യാത്ര സംഘത്തിലെ 13 പേർക്ക് വഴി തെറ്റുകയായിരുന്നു. മെയിൻ റോഡിലേക്ക് 35 കിലോമീറ്റർ മാത്രം ഉള്ളപ്പോഴാണ് യാത്ര സംഘത്തിന് വഴി തെറ്റുന്നത്.
