കാസർകോട്: ബി.ജെ.പി ബന്ധത്തെ തുടർന്ന് കോണ്‍ഗ്രസ് പഞ്ചായത്ത് അംഗത്തെ പാർട്ടിയില്‍നിന്ന് സസ്‌പെൻഡ് ചെയ്തു. പൈവളിഗെ പഞ്ചായത്ത് അംഗം അവിനാശ് മച്ചാദോയ്‌ക്കെതിരെയാണു നടപടി.
പഞ്ചായത്ത് പ്രസിഡന്റായ സി.പി.എം അംഗത്തിനെതിരെ ബി.ജെ.പി അവതരിപ്പിച്ച അവിശ്വാസ പ്രമേയത്തിന് അനുകൂലമായി അവിനാശ് വോട്ട് ചെയ്തിരുന്നു.
പൈവളിഗെ പഞ്ചായത്തില്‍ എട്ടുവീതം അംഗങ്ങളാണ് എല്‍.ഡി.എഫിനും ബി.ജെ.പിക്കുമുള്ളത്. നേരത്തെ നറുക്കെടുപ്പിലൂടെ സി.പി.എമ്മിന് പ്രസിഡന്റ് സ്ഥാനവും ബി.ജെ.പിക്ക് വൈസ് പ്രസിഡന്റ് സ്ഥാനവും ലഭിക്കുകയായിരുന്നു.
ഇതിനിടയിലാണ് കഴിഞ്ഞ ദിവസം ബി.ജെ.പി പ്രസിഡന്റിനെതിരെ അവിശ്വാസം കൊണ്ടുവന്നത്. ഇന്നലെയാണ് പ്രമേയം ചർച്ചയ്‌ക്കെടുത്തത്. ഇതിനെ പഞ്ചായത്തിലെ ഏക കോണ്‍ഗ്രസ് അംഗമായ അവിനാശ് പിന്തുണയ്ക്കുകയായിരുന്നു. എന്നാല്‍, മുസ്‌ലിം ലീഗിന്റെ രണ്ട് അംഗങ്ങളും അവിശ്വാസത്തെ എതിർത്ത് സി.പി.എമ്മിനെ പിന്തുണച്ചു. ഇതോടെ പ്രമേയം തള്ളിപ്പോകുകയായിരുന്നു.
