മലപ്പുറം: പരപ്പനങ്ങാടിയില്‍ 3.18 കിലോഗ്രാം കഞ്ചാവ് പിടികൂടി. ഒരാളെ അറസ്റ്റ് ചെയ്തു. കണ്ണൂർ ഇരിട്ടി സ്വദേശി സാം തിമോത്തിയോസ് ആണ് പിടിയിലായത്.
ആർ.പി.എഫും തിരുരങ്ങാടി എക്സൈസ് സർക്കിള്‍ ഓഫീസും ചേർന്നുനടത്തിയ സംയുക്ത പരിശോധനയില്‍ പരപ്പനങ്ങാടി റെയില്‍വേ സ്റ്റേഷനില്‍ നിന്നാണ് ഇയാള്‍ പിടിയിലായത്. അന്യസംസ്ഥാനങ്ങളില്‍ നിന്ന് ട്രെയിൻ മാർഗ്ഗം കഞ്ചാവ് കേരളത്തില്‍ എത്തിച്ചു വില്പന നടത്തുന്ന ലഹരി സംഘത്തിലെ കണ്ണിയാണ് പ്രതി.
അതേസമയം, കണ്ണൂരിലെ കണ്ണപുരം മൊട്ടമ്മല്‍ ഭാഗങ്ങളില്‍ ഇതര സംസ്ഥാന തൊഴിലാളികള്‍ക്ക് കഞ്ചാവ് വില്പന നടത്തിയിരുന്നയാളും എക്സൈസ് പിടിയിലായി. കണ്ണൂർ സ്‌പെഷ്യല്‍ സ്‌ക്വാഡ് സംഘമാണ് 1.75 കിലോഗ്രാം കഞ്ചാവ് സഹിതം ബംഗാള്‍ സ്വദേശി സുദീപ് ലട്ടയെ അറസ്റ്റ് ചെയ്തത്. എക്സൈസ് സർക്കിള്‍ ഇൻസ്‌പെക്ടർ ഷാബു സിയും പാർട്ടിയും പൊടിപ്പുറം ഇരിണാവ് റോഡില്‍ വച്ചാണ് ഇയാളെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു.
