കാസർകോട്: കൃഷി ഒരു ഉപജീവനമാർഗ്ഗത്തിനപ്പുറം ജീവിതചര്യയാക്കി മാറ്റുകയും, മണ്ണറിഞ്ഞ് അധ്വാനിച്ച് നൂറുമേനി വിളയിക്കുകയും ചെയ്ത പ്രമുഖ കർഷകനും സാമൂഹിക പ്രവർത്തകനുമായ പരപ്പ അഷ്റഫ് ഹാജിക്ക് ‘റിയൽ ഇന്ത്യ വിഷൻ ഗ്രീൻ വാരിയർ’ പുരസ്കാരം. ബിസിനസ്സ് തിരക്കുകൾക്കിടയിലും ജൈവകൃഷിയിലൂടെയും ക്ഷീരകൃഷിയിലൂടെയും അദ്ദേഹം നടത്തിയ സമാനതകളില്ലാത്ത ഇടപെടലുകൾ പരിഗണിച്ചാണ് ഈ ആദരം.
ജനുവരി 31-ന് കാസർകോട് മുൻസിപ്പൽ സ്റ്റേഡിയത്തിൽ വെച്ച് നടക്കുന്ന ‘ടോട്ടോ ഹൈപ്പർ മാർക്കറ്റ് മെഹ്ഫിൽ രാവ് സീസൺ വൺ ഗ്രാൻഡ് ഫിനാലെ’ വേദിയിൽ വെച്ച് പുരസ്കാരം സമ്മാനിക്കും.
ഹാർഡ്വെയർ, ടൈൽസ് ബിസിനസ്സ് രംഗത്ത് സജീവമായിരിക്കുമ്പോഴും കൃഷിയെ ഒരു ലഹരിയായി കൊണ്ടുനടക്കുന്ന വ്യക്തിയാണ് അഷ്റഫ് ഹാജി. പിതാവിൽ നിന്ന് ലഭിച്ച കൃഷിപാഠങ്ങൾ ദേലമ്പാടിയിലെ തന്റെ മണ്ണിൽ അദ്ദേഹം പ്രായോഗികമാക്കി. കവുങ്ങ്, തെങ്ങ്, റബ്ബർ എന്നിവയോടൊപ്പം ഇടവിളയായി കൊക്കോ, പൈനാപ്പിൾ, കുരുമുളക്, ഏലം എന്നിവയും അദ്ദേഹം കൃഷി ചെയ്യുന്നു. കാലിത്തീറ്റയ്ക്കായി പ്രത്യേകം തീറ്റപ്പുല്ല് കൃഷിയും അദ്ദേഹം തന്റെ തോട്ടത്തിൽ ഒരുക്കിയിട്ടുണ്ട്.
ക്ഷീരകൃഷിയിലെ കരുത്ത് സംസ്ഥാന സർക്കാരിന്റെ ക്ഷീരകർഷക അവാർഡ് മൂന്ന് തവണ നേടിയ അഷ്റഫ് ഹാജിക്ക് തന്റെ പശുക്കളാണ് ജീവിതത്തിലെ ഏറ്റവും വലിയ ആനന്ദം. ഏതൊരു പ്രതിസന്ധിഘട്ടത്തിലും പശുക്കൾക്കൊപ്പം സമയം ചിലവഴിക്കുന്നത് തനിക്ക് വലിയ ഊർജ്ജം നൽകുന്നുവെന്ന് അദ്ദേഹം സാക്ഷ്യപ്പെടുത്തുന്നു. പൂർണ്ണമായും ജൈവരീതി പിന്തുടരുന്ന അദ്ദേഹം പശുക്കളുടെ ചാണകമാണ് വിളകൾക്ക് വളമായി ഉപയോഗിക്കുന്നത്.
കാർഷിക അവശിഷ്ടങ്ങൾ പോലും ഫലപ്രദമായി ഉപയോഗപ്പെടുത്തുന്ന അദ്ദേഹത്തിന്റെ പാള പ്ലേറ്റ് നിർമ്മാണ യൂണിറ്റ് ശ്രദ്ധേയമാണ്. കവുങ്ങിൻ പാളയിൽ നിന്ന് നിർമ്മിക്കുന്ന ഈ പ്ലേറ്റുകൾക്ക് ഇന്ന് തമിഴ്നാട്, ആന്ധ്ര തുടങ്ങിയ ദക്ഷിണേന്ത്യൻ സംസ്ഥാനങ്ങളിൽ വലിയ ഡിമാൻഡാണുള്ളത്. കർണാടക സർക്കാരും ദി ഹിന്ദു പത്രവും സംയുക്തമായി നൽകിയ ദക്ഷിണ കർണ്ണാടക ജൈവ കർഷക അവാർഡ് ഉൾപ്പെടെ നിരവധി പുരസ്കാരങ്ങൾ അദ്ദേഹത്തെ തേടിയെത്തിയിട്ടുണ്ട്.
പൊതുരംഗത്തെ സാന്നിധ്യം കൃഷിയിലെന്നപോലെ പൊതുരംഗത്തും അദ്ദേഹം സജീവമാണ്. നിലവിൽ മുസ്ലിം ലീഗ് ദേലമ്പാടി പഞ്ചായത്ത് പ്രസിഡന്റായും, പഞ്ചായത്ത് ആസൂത്രണ സമിതി വൈസ് ചെയർമാനായും പ്രവർത്തിച്ചുവരികയാണ്. കാസർകോടിന്റെ കാർഷിക പാരമ്പര്യത്തിന് പുതിയ ഉണർവ് നൽകുന്ന അഷ്റഫ് ഹാജിയുടെ ജീവിതം പുതിയ തലമുറയ്ക്ക് വലിയൊരു പാഠപുസ്തകമാണ്.
