ചെന്നൈ: നടൻ വിജയ്‌ക്ക് നേരെ ചെരുപ്പേറ്. അന്തരിച്ച നടനും രാഷ്‌ട്രീയ നേതാവുമായ വിജയകാന്തിന് അന്തിമോപചാരമര്‍പ്പിച്ച്‌ മടങ്ങവെയായിരുന്നു സംഭവം.
ഇതിന്റെ വീഡിയോ ദൃശ്യങ്ങള്‍ സമൂഹമാദ്ധ്യമങ്ങളില്‍ വ്യാപകമായി പ്രചരിക്കുകയാണ്. തിരക്കിനിടയിലൂടെ തന്റെ വാഹനത്തിലേയ്‌ക്ക് പോവുകയായിരുന്ന വിജയ്‌യുടെ തലയിലേയ്‌ക്ക് ചെരുപ്പ് വീഴുന്നത് വീഡിയോയില്‍ കാണാനാകും. സംഭവത്തിന് പിന്നില്‍ ആരാണെന്ന് കണ്ടെത്താനായിട്ടില്ല.
ചെന്നൈയിലെ ഡിഎംഡികെ ആസ്ഥാനത്ത് നടന്ന പൊതുദര്‍ശന ചടങ്ങിലാണ് പ്രിയ ക്യാപ്റ്റനെ കാണാൻ വിജയ് എത്തിയത്. വിജയകാന്തിന്റെ ഭാര്യ പ്രേമലതയെയും മക്കളായ വിജയ പ്രഭാകരൻ, ഷണ്‍മുഖ പാണ്ഡ്യൻ എന്നിവരെയും കണ്ട് അദ്ദേഹം അനുശോചനം അറിയിച്ചു.
വിജയ്‌യുടെ പിതാവും സംവിധായകനുമായ എസ്‌എ ചന്ദ്രശേഖറുമായി വിജയകാന്ത് പലപ്പോഴും സഹകരിച്ചു പ്രവര്‍ത്തിച്ചിരുന്നു. ഇരുവരും ഒരുമിച്ച സിനിമകള്‍ വിജയകരമായ സംരംഭങ്ങളായിരുന്നു. ‘നാളയ തീര്‍പ്പ്’ എന്ന ചിത്രത്തിലൂടെ വിജയ് അരങ്ങേറ്റം കുറിച്ചപ്പോള്‍ അത് വലിയ പരാജയമായി മാറി. തന്റെ മകന്റെ സിനിമാ ഭാവി മികച്ചതാക്കാനായി അവനൊപ്പം ഒരു സിനിമയില്‍ അഭിനയിക്കണമെന്ന് ചന്ദ്രശേഖര്‍ വിജയകാന്തിനോട് അപേക്ഷിക്കുകയായിരുന്നു . വിജയകാന്ത് യാതൊരു മടിയുമില്ലാതെ ആ അപേക്ഷ സ്വീകരിച്ച്‌ വിജയ്‌ക്കൊപ്പം അഭിനയിച്ചു. ആ ചിത്രമാണ് വിജയ്‌യുടെ കരിയറിലെ ആദ്യ ഹിറ്റായ ‘സിന്ദൂരപാണ്ടി’.
‘വിജയകാന്ത് വിജയ്‌ക്ക് ചെയ്തത് വലിയ സഹായമാണ്, അത് ചെയ്തില്ലെങ്കില്‍ വിജയ് ഇവിടെ ഉണ്ടാകില്ലായിരുന്നു’വെന്ന് വിജയകാന്തിന്റെ സിനിമാ ജീവിതത്തിന്റെ നാല്പതാം വാര്‍ഷികാഘോഷപരിപാടിയില്‍ എസ്‌എ ചന്ദ്രശേഖര്‍ പറഞ്ഞിട്ടുണ്ട്.
