നായകളെ നന്നായി പരിപാലിക്കാൻ അറിയാമോ? എങ്കിൽ നല്ലൊരു ജോലിയുണ്ട്.. വെറും ജോലിയല്ല. മാസം രൂപ ശമ്പളം ലഭിക്കുന്ന ജോലി. ജോലി യുകെയിലാണ്. ഒരു വളര്‍ത്തുനായയെ നോക്കാൻ ആളെ വേണം. വെറുതെ അല്ല- നല്ല ശമ്പളം നല്‍കും. നല്ല ശമ്പളം എന്ന് പറഞ്ഞാല്‍ വര്‍ഷത്തില്‍ ഒരു കോടിയെങ്കിലും കിട്ടുന്ന തരത്തിലുള്ള പാക്കേജ്. എന്നുവച്ചാല്‍ ഏതാണ്ട് 9 ലക്ഷം രൂപ മാസം കീശയില്‍ വരും.
പക്ഷേ ഇത്രയും ശമ്പളം കിട്ടുമ്പോള്‍, ജോലിയുടെ ഉത്തരവാദിത്തവും അത്രയും കൂടുതലായിരിക്കും. നായയുടെ ഇടവും വലവും നില്‍ക്കണം. അതിന്‍റെ ഡയറ്റ് (ഭക്ഷണം), വ്യായാമം വിശ്രമം, വിനോദം എന്നിങ്ങനെ എല്ലാ കാര്യങ്ങളിലും വ്യക്തമായ കാഴ്ചപ്പാടും അറിവും ഇടപെടലും ഉണ്ടാകണം. അതിനുള്ള കഴിവ് ഉദ്യോഗാര്‍ത്ഥിക്ക് നിര്‍ബന്ധമായും ഉണ്ടായിരിക്കണം എന്നത് പരസ്യത്തില്‍ പ്രത്യേകം പരാമര്‍ശിച്ചിട്ടുണ്ട്. സ്വകാര്യമായ പല കാര്യങ്ങളും മാറ്റിവയ്ക്കാൻ തയ്യാറാകണം. മുഴുവൻ സമയവും നായ്ക്കൊപ്പം ചെലവിടണം. യാത്രകളിലും നായയ്ക്കൊപ്പം അകമ്പടിയായി പോകണം. ഇങ്ങനെ പോകുന്നു മാനദണ്ഡങ്ങള്‍.
പരസ്യം വൈറലായതിന് പിന്നാലെ രണ്ടായിരത്തിലധികം പേരെങ്കിലും ജോലിക്ക് അപേക്ഷിച്ചുവെന്നാണ് ചില റിപ്പോര്‍ട്ടുകള്‍ സൂചിപ്പിക്കുന്നത്. അതേസമയം ആരുടെ വളര്‍ത്തുനായ ആണ് ഇതെന്നോ, ഏത് ഇനത്തില്‍ പെട്ടതാണെന്നോ ഒന്നും വ്യക്തമല്ല. ഈ വിവരങ്ങളെല്ലാം രഹസ്യമായി തന്നെ തുടരുകയാണ്.
