കൊച്ചിയില്‍ ആഡംബര ഹോട്ടല്‍ കേന്ദ്രീകരിച്ച് ലഹരി വില്‍പ്പന നടത്തിയ മൂന്ന് പേരെ എറണാകുളം സൗത്ത് പോലീസ് അറസ്റ്റ് ചെയ്തു. ഓച്ചിറ സ്വദേശി റിജു, കുറുവിലങ്ങാട് സ്വദേശി ഡിനോ ബാബു, തലശ്ശേരി സ്വദേശിനി മൃദുല എന്നിവരാണ് പിടിയിലായത്. സിറ്റി പോലീസ് കമ്മീഷണറുടെ നിര്‍ദേശപ്രകാരം നടത്തിയ അന്വേഷണത്തിലാണ് പ്രതികള്‍ പിടിയിലായത്.
മധ്യകേരളം കേന്ദ്രീകരിച്ച് രാസലഹരി വില്‍പ്പന നടത്തുന്ന പ്രധാനസംഘമാണ് പിടിയിലായതെന്നാണ് പോലീസ് നല്‍കുന്ന വിവരം. ലഹരിയുടെ ഉറവിടം, ആര്‍ക്കൊക്കെ വിതരണം ചെയ്യുന്നു, മറ്റ് കൂട്ടാളികളുണ്ടോ മുതലായ കാര്യങ്ങളും പോലീസ് പരിശോധിച്ചുവരുകയാണ്. റിജുവും ഡിനോയും നിരവധി കേസുകളില്‍ പ്രതികളാണ്. ലഹരി വില്‍പ്പന കൂടാതെ വിദേശ ജോലി വാഗ്ദാനംചെയ്ത് പണംതട്ടിയ കേസിലും ഇവര്‍ പ്രതികളാണ്.
