ഇടുക്കി നെടുങ്കണ്ടം കൗന്തിയില്‍ ഭാര്യാപിതാവിനെ യുവാവ് വെട്ടിക്കൊന്നു. പുതുപ്പറമ്പില്‍ ടോമിയാണ് കൊല്ലപ്പെട്ടത്. ഇദ്ദേഹത്തിന്റെ മരുമകനായ മാവടി സ്വദേശി ജോബിന്‍ തോമസിനെ പോലീസ് കസ്റ്റഡിയിലെടുത്തു.ആക്രമണത്തില്‍ ടോമിയുടെ മകളും ജോബിന്റെ ഭാര്യയുമായ ടിന്റുവിന് ഗുരുതരമായി പരിക്കേറ്റു.ബുധനാഴ്ച അര്‍ധരാത്രിയോടെയാണ് സംഭവം.
സാരമായി പരിക്കേറ്റ ടോമിയെ നെടുങ്കണ്ടം താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ടിന്റുവിനെ വിദഗ്ധ ചികിത്സക്കായി കോട്ടയം മെഡിക്കല്‍ കോളേജിലേക്ക് മാറ്റി. കുടുംബ പ്രശ്നമാണ് കൊലപാതക കാരണമെന്നാണ് പോലീസ് സംശയിക്കുന്നത്. ടിന്റുവും ഭര്‍ത്താവ് ജോബിനും അകന്നുകഴിയുകയായിരുന്നു. കസ്റ്റഡിയിലുള്ള ജോബിന്റെ അറസ്റ്റ്‌ രേഖപെടുത്തി റിമാൻഡ്‌ ചെയ്‌തു.
