കണ്ണൂർ: കണ്ണൂരിൽ തീവണ്ടി തീവെച്ച കേസിൽ കസ്റ്റഡിയിലെടുത്ത ബംഗാൾ സ്വദേശിയുടെ മൊഴി പുറത്ത്. കസ്റ്റഡിയിലുള്ളയാൾ മുമ്പ് റെയില്‍വേ ട്രാക്കിന് സമീപത്തെ കുറ്റിക്കാടിന് മുമ്പ് തീയിട്ടയാളാണ്. സംഭവത്തിൽ അന്ന് റെയിൽവെ അധികൃതർ പോലീസിൽ വിവരമറിയിച്ചിരുന്നെങ്കിലും കാര്യമായ നടപടി ഒന്നും ഉണ്ടായിരുന്നില്ല. തീവെപ്പിന് തൊട്ട് മുൻപ് ട്രാക്കിന് പരിസരത്ത് കസ്റ്റഡിയിലെടുത്തയാൾ ഉണ്ടായിരുന്നതായി സിസിടിവി ദൃശ്യങ്ങളിൽ നിന്ന് വ്യക്തമായിരുന്നു. ഇയാളെ കണ്ടതായി ബിപിസിഎൽ സുരക്ഷ ജീവനക്കാരനും മൊഴി നൽകിയിരുന്നു.
പ്രതിയെ വിശദമായി ചോദ്യം ചെയ്തതോടെയാണ് വിവരങ്ങൾ പുറത്ത് വന്നത്. ബംഗാളി സ്വദേശിയുടെ അറസ്റ്റ് ഉടനുണ്ടാകുമെന്നാണ് പുറത്ത് വരുന്ന റിപ്പോർട്ടുകൾ. ഭിക്ഷ എടുക്കാൻ സമ്മതിക്കാത്തതിലുള്ള വിരോധം കാരണമാണ് ട്രെയിനിന് തീ വെച്ചതെന്നാണ് പ്രതി പോലീസിന് നൽകിയ മൊഴി. സുരക്ഷ ഉദ്യോഗസ്ഥരോടുള്ള വിരോധമാണ് പ്രകോപനം ഉണ്ടാക്കിയതെന്നും പ്രതി വെളിപ്പെടുത്തിയതായാണ് പോലീസ് വ്യക്തനാക്കുന്നത്.
എക്സിക്യൂട്ടീവ് എക്സ്പ്രസിലെ ബോഗിക്ക് തീ വെച്ചത് ഇന്ധനം ഉപയോഗിച്ചാണോ എന്നത് ഫോറൻ‍സിക് പരിശോധനയിൽ വ്യക്തമായിട്ടില്ലെന്നാണ് റിപ്പോർട്ടുകൾ. ഇക്കാര്യം ഉറപ്പിക്കാൻ കഴിഞ്ഞ ദിവസം വൈകിട്ട് വീണ്ടും ബോഗിയിൽ പരിശോധന നടത്തിയിട്ടുണ്ട്. ഇതിന്റെ ഫലം കൂടി ലഭിച്ചാൽ മാത്രമാകും കൂടുതൽ നടപടി ഉണ്ടാകുക.
അന്ന് കുറ്റിക്കാട്ടിന് തീയിട്ട ശേഷം ട്രാക്കിലേക്ക് കടന്ന് ഉടുമുണ്ട് കത്തിച്ചെറിഞ്ഞാണ് ഇയാള്‍ സ്ഥലത്ത് നിന്നും രക്ഷപ്പെട്ടതെന്നാണ് പുറത്ത് വരുന്ന് റിപ്പോർട്ടുകൾ. സംഭവം അപ്പോള്‍ തന്നെ ലോക്കല്‍ പോലീസിനെ അറിയിച്ചിരുന്നതായി കണ്ണൂര്‍ റെയിൽ സ്റ്റേഷന്‍ അധികൃതര്‍ പറയുന്നു. പക്ഷേ ഇയാള്‍ക്ക് മാനസിക പ്രശ്നങ്ങളുണ്ടാകാമെന്ന് പറഞ്ഞ് പോലീസ് അന്ന് നടപടി സ്വീകരിച്ചില്ലെന്നാണ് ആക്ഷേപം.
അതേസമയം കണ്ണൂരിൽ ട്രെയിനിന്റെ ബോഗി കത്തിച്ച സംഭവം ദൗർഭാഗ്യകരമാണെന്ന് റെയിൽവെ പ്രൊട്ടക്ഷൻ ഫോഴ്സ് ഡി.ഐ.ജി സന്തോഷ് എൻ. ചന്ദ്രൻ പറഞ്ഞു. കണ്ണൂർ റെയിൽവെസ്റ്റേഷനിൽ തീവെച്ച എക്സിക്യൂട്ടീവ് ട്രെയിൻ ബോഗി സന്ദർശിച്ച ശേഷം മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. എലത്തൂർ തീവയ്പിനു ശേഷം പാലക്കാട് ഡി വിഷനിൽ കൂടുതൽ സുരക്ഷ ഏർപ്പെടുത്തിയിരുന്നു. ലോക്കൽ പോലീസ് തന്നെയാണ് നിലവിൽ കേസ് അന്വേഷിക്കുന്നത്. കേസിനെ പറ്റി കൂടുതൽ വിവരങ്ങൾ ഇപ്പോൾ പുറത്തുവിടാനായിട്ടില്ലെന്നും അദ്ദേഹം പറഞ്ഞു.
