ദളപതി വിജയുടെ മകൻ ജേസൺ സഞ്ജയ് സംവിധയക വേഷത്തിലേക്ക്. ലൈക പ്രൊഡക്ഷൻസുമായിച്ചേർന്ന് അദ്ദേഹം തന്റെ ആദ്യ സംവിധാന സംരംഭത്തിൽ ഒപ്പുവച്ചു. ഇതിന്റെ ചിത്രങ്ങൾ പ്രൊഡക്ഷൻ ഹൗസ് പങ്കുവെച്ചാണ്‌ പ്രഖ്യാപനം നടത്തിയത്‌. കാസ്റ്റിംഗ് നടപടികൾ തുടർന്നുവരികയാണെന്നും സഞ്ജയ് അറിയിച്ചു. ഇക്കാര്യം അറിഞ്ഞതോടെ നിരവധി വിജയ്‌ ആരാധകരാണ് സഞ്ജയ്‌ക്കും വിജയ്‌ക്കും ആശംസകളുമായി സോഷ്യൽ മീഡിയയിൽ എത്തിയത്.
ജെയ്‌സൺ സഞ്ജയ് സംവിധായകനാകാനുള്ള തന്റെ ആഗ്രഹം നേരത്തെ തന്നെ വ്യക്തമാക്കിയിരുന്നു. അദ്ദേഹത്തിന്റെ മുത്തച്ഛനും ചലച്ചിത്രകാരനുമായ എസ്എ ചന്ദ്രശേഖറും പല അഭിമുഖങ്ങളിലും ഇക്കാര്യം വെളിപ്പെടുത്തിയിട്ടുണ്ട്. ജെയ്‌സൺ സഞ്ജയ് ടൊറന്റോ ഫിലിം സ്‌കൂളിൽ (2018-–-2020) ഫിലിം പ്രൊഡക്ഷനിൽ ഡിപ്ലോമയും തുടർന്ന് 2020-2022 കാലയളവിൽ ലണ്ടനിൽ തിരക്കഥാരചനയിൽ ബിഎ (ഓണേഴ്‌സ്) ബിരുദവും നേടിയിട്ടുണ്ട്.
